Che travaj pi bin fait ëd na rampiada an na caoda giornà ëd metà november? E doi balengo pi gadan ëd tuti ai cherdo pròpi e parej i trovoma ch'as dan da fe sle bele bòce, ehm, pardòn, ròche 'd la Lausa Bruna, ant 'l bel circo 'dla Val Stura. Rivoma prest a le muraje e mentre spetoma ch'ai riva ël sol as godoma i bej color ëd cost magnific otogn.
Rampioma con piasì i set tir 'dla via ch'a eufr na prima part bastansa placosa (le prime tre longhësse), segoije da na sconda session co quàich pas vèrtical ma sèmpe técnich. A l'é mach 'n darmagi che la rampiada a perda man a man la continuità e che dal quart tir an anans a venta fé sovens dë spostament.
Resta an tute manere na rampiada divertenta, bastansa omogenea sël V/V+ con na magnifica muraja (5c+) sla L5, 'n pas 'n pòch dur (6a) sla L6 e na bela muraja con fissure sla L7, mach 'n pòch spòrca.
E alora soma si, bele sodisfait për la rampiada d'ancheuj, ch'i l'oma portà fin-a a la fin, 'n bel travaj nòstr ma sovratut 'd coj-lì ch'a l'an duvertala.
Ah, nò, ai manca 'ncora 'l sòlit sanguis 'dla fin 'dla giornà për podei di d'essi sodisfait fin-a ën fond.